سلمان الوهيف الرويلي يالله عسى هالعام يسوق التباشير

يالله عسى هالعام يسوق التباشير

يالله عسى هالعام يسوق التباشير
ويسوق خيرٍ وافين كل ليله
ويردم سحابٍ بالسماء لينه يصير
مثل الجبال الشامخه في مخيله
ترعد وتبرق فوقنا صبح وعصير
ويجي مطرها شاملٍ في هميله
والسيل يدرج بالشعاب المهاجير
له مدةٍ محدٍ سمع في مسيله
ونسمع علومٍ من رجالٍ مداوير
لقو ربيعاً ماخبرنا مثيله
نطلع ونكشت للفياض المخاضير
نسمة هواها كل همٍ تزيله
قلبي أنا مشتاق شوف النواوير
وريح الخزامى والنفل أهتوي له
وتشوف حوله الخباري مجاوير
وصوت أم سالم واللحون الجميله
وخوة رجالٍ ماتحسب المخاسير
تطرب معاهم كل نفسٍ عليله
ماهمهم طول البعد والمشاوير
أهل العلوم الغانمه والفضيله
نجلس نشب النار من دون تأخير
نسهر عليها نارنا نرتكي له
في جالها صفة دلالٍ مساطير
مركيةٍ على الجمر والمليله
مصفيةٍ من حثلها والمكادير
مضبوطةٍ وزنه وبنه وهيله
لاخذت لك فنجال تنسى التفاكير
وتنسى وجع راسك وهمٍ تشيله
ولاحان وقت الفرض من دون تقصير
قمنا بواجب فرضنا دون ميله
ولافج ضو الصبح رحنا مداوير
عن الكمأ والكل يربط شليله
تلقى الزبيدي كبر راس المغاتير
متشابكن رقروقها والنفيله
هذا جمع عشره على أقل تقدير
وهذا عجل ماغير هوبر حصيله
هذي مناة الروح يالله عسى خير
ردد معي ياسامعاً للجزيله
يالله عسى هالعام يسوق التباشير
ويجي ربيعاً ماخبرنا مثيله

مشكورررررررررررررررررر الله يعطيك العافبه

يعطيك العافيه على متقدمه وتستاهل الخير

» سلمان الوهيف الرويلي خلك على الدنيا قليل المطاليب
» من قصائد الدكتور سلمان العودة....!!
» يالله ياجالي الامور المهمه
» برغش بن زيد العريعر يالله.. يا خالف علينا ..تعبنا
» مشلح بن براك الغنامي يالله انك على الدنيا وأهلها تعين