اكذب بيوت الشعر بيت اللي يقول
......................ما الحب إلا للحبيب الاولي
واكبر دليل انك معي اربع فصول
..............................والغيت كل الناس يا ريحة هلي
الغيتهم وانا احسب إن مالي ميول
..............................إلا لاول حب بالقلب الخلي
بس انت ما خليت للماضي قبول
..............................وعلمتني بالحب مقدار جهلي
وسميت بإسم الله عليك من النضول
...............................واللي يهدم البير من فوق الدلي
هلا هلا يا فزة الظبي الجفول
..............................يامن لك الخافق يفيض ويمتلي
حقي عليك تحبني حسب الاصول
..............................وان كان انا ما اوفيت لك حقك علي
اشغلت فيك الناس واصحاب العقول
....................................ما غير اسولف عنك وافليها فلي
الين سمّوني المهابيل مهبول
.................................وانا هبالي لك وثقل العقل لي
وش لي لا والله مابقى لي شي مول
...........................يا مول عن شعب الامارات اوملي
اخذتني كلي وانا كلي ذهول
............................مدري غلا ولا غلو ولا غلي
مثل الخليفه والأمه ذات الحجول
..............................يوم اسمعوا صوت صفير البلبلي
مالك سوى تامر وانا لامرك عجول
.................................حتى ولو امرك هدم مستقبلي
اقول إيوه وان بغيت الإيه اقول
...............................ولا على قولة هل البصره بلي
معك معك دايم ورغم انف العذول
............................اعلن موافقتي وشرطي ما يلي
إنك ترضّاني اليا جيتك زعول
................................وإنك تزعلني اليا غاب زعلي
وإنك تقاضالي من الرمض الكسول
..................................وإنك تلّحفني الجديل المخملي
مانك موافق زين يالظبي الجفول
................................باقي معي كلمه بصدري تصطلي
تبي الصراحه عاد صادق من يقول
...............................ما الحب الا للحبيب الاولي