ابو حدود
مرحبا بك زائرنا الكريم


<
 
الرئيسيةالتسجيلاليوميةمكتبة الصورس .و .جبحـثدخول

شاطر | 
 

 مجموعه من قصائد محمد مريبد العازمي :

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابو عواصف
الادارة تقدم شكرهـا لك على جهودك ♥♥♥
الادارة تقدم شكرهـا لك على جهودك ♥♥♥


عدد المساهمات : 145
تاريخ التسجيل : 04/02/2011

مُساهمةموضوع: مجموعه من قصائد محمد مريبد العازمي :   الأربعاء فبراير 16, 2011 10:32 am

بــذرة غــلا

ابتديتك علاقه وانتهيتك غرام
ومن سقيتك قصيدي وانت بذرة غلا
حتى غنت ببستانك طيور الحمام
وصرت احصدك لبيت الشعر شوق وولا
مايمر الغلا الصادق مرور الكرام
كان ماكتب قصيدي فيك ولا فلا
جيت مثل الغمام ورحت مثل العسام
كنك المكرم اللي عن دياره جلا
الله اكبر جبرني الشوق جبر العظام
لين شرب السهر مني ليال وكلا
روح لا تعتذر والحمل فوق السنام
منت اول حبيب(ن) عن حبيبه سلا






حــــزن الطــواريــق

الموقف اللي جـر حـزن الطواريـق
لـو مايسلـي خـاطـري مابديـتـه
طعنه ولكن طعنةٍ(ن) فـي المعاليـق
ماهوب جرح(ن) لاسمرنـي كويتـه
من أول اضحك لو على خاطري ضيق
واليوم ضاق الصـدر واهتـز بيتـه
حصاه طاحت من حصى قمة طويـق
مـن بعدهـا رجـم الغـلا مارقيتـه
انام من طول السهر وأرجـع افيـق
واجمع خواطر ليلـي اللـي سريتـه
أبيات فيها مـن قصيـد العشاشيـق
وابلغ منه واصدق من اللـي قريتـه
انفسروها قلـت مـن غيـر تعليـق
وان بينـت لـي بـن عـم ونخيتـه
ملفـاي مقـدام الوجيـه المطاليـق
اللي ليـا مـن دبـر الوقـت جيتـه
ماهوب ملفق حولي الهـرج تلفيـق
فـي لازمـي لارحـت يمـه لقيتـه
من لابت(ن) مثل الجبال الشواهيـق
وعلى الظروف اعزومهـا مستميتـه
ربعي مضاميـن العهـد والمواثيـق
وان طمع جار البيت في جـار بيتـه
حققت شيء وشيء يحتـاج تحقيـق
حلم(ن) بقالـي حـي لـو ماخذيتـه
إن قالهـا الله واليـالـي توافـيـق
لا اقطع ضرم نفسي ولـو مارويتـه
ماهو ضرم فنجال دلـه مـع بريـق
ضـرم وصـال اللـي لعلـه ياليتـه
تسمح له ضروف الزمـان الواحيـق
اللـي تناسينـي وانــا مانسيـتـه
فوق الخطر دون الوصل نشفت الريق
وحبل اللقـاء لـو ماربعتـه ثنيتـه
البعد شلفى ذيـاب سـم الصناديـق
والقرب يرفى جـرح لـو ماهتنيتـه
مخلـوق لكـن دون كـل المخاليـق
حتـى عقالـي دون حزنـه رميتـه
موقف حزيـن وبددتهـا الطواريـق
وانـا وقفـت بموقفـي واحتميـتـه






البقا لله (مرثيه في الشاعر نواف منور العازمي)

نواف منور والبقا لله
غنيتها من وزا ماني بطرباني
غنيتها والخدود السمر مبتله
يبرق غضبهاويمطر دمع الاعياني
اي والله اني حزنت اي والله اي والله
وسريت ابلحق على فدنه ولا امداني
اخذت خط الكويت وجيت عاني لـّه
ولاغريبه اليا من جيت له عاني
باودعه لكن الموت ما امهله
خذاه من ياخذ الاول مع الثاني
يامن لياهل هملول المطر هله
ترخي على جال قبره غر الامزاني
ويامن بظله يظلل يوم لاظله
تظلله تحت عرشك وانت رحماني
باارثيه ساعه زومن وسنين واهله
وابذكره مثل ما اذكر خيرة اخواني
ويرثيه ربعه وجار البيت والفله
ويرثيه حتى سويك البنز الالماني
شاعر مفوه يعقد البيت ويحله
وان جر صوته يكسر جزل الالحاني
شجاع وليا وقف مايطري الذله
وليا سرى الليل مسرى الذيب سرحاني
من دون ربعه وقف ميقاف نصرالله
اللي وقف لليهود بحرب لبناني
ارثيه لانه كفو وانا بناخي له
ويرثيه يامي وسنعوسي وقحطاني
والامر لله يومه والبقا لله
اجل مسمى وعمر الادمي فاني






ارتب الجمل

الكلمة اللي جرحت صدري ولامعهـا عمـل
كنيتها بين الضلـوع العـوج قبـل اقولهـا
اليوم ماعنها عذر والباب ياسـع لـه جمـل
والناس مااقطع من يمانيها واحش ارجولهـا
ان كان مااجمع لي شمل ماني مفرق لي شمل
واهل الفعول اللي تنومس ماجحدت افعولهـا
وان كان ياحاتم رفيقي لاحقـه منـي زمـل
ليته مكاني جـرب الوقفـة علـى اصولهـا
اشوف هو يصنع امل حتى ولو مالـه امـل
مع اني ادري ماهي بحوله ولاهـو حولهـا
والكامـل الله والبنـادم لويكمـل مـا كمـل
لويملك كنوز البسيطة عرضها مـع طولهـا
اما انا لامن عشقت اعتشق إلى حـد الثمـل
وليا بطشت ابطش بكف ما بطـل مفعولهـا
ولياكتبت الشعر ما أنقز سطر وارتب جمـل
والنـاس لا كافـل مقردهـا ولا مكفولـهـا
وليا اعترض بالدرب ابو وجهين مايقفى همل
والحرب ماتطحن رحاها قبـل دق اطبولهـا
رسالةٍ حمل جمل سـق الجمـل بمـا حمـل
يمكن ياحاتم ترتـدع نـاسٍ تعـن خيولهـا





الصباحيه

البارحـة ياطـول ليـل المشاريـه
بين اختلاف الراي واصل الحقيقـه
الجيب ساري واسود الليـل قافيـه
اهو رفيـق الـدرب وانـا رفيقـه
حركت من شرق الكويت وشواطيـه
اللي على بحـر الخليـج ومضيقـة
مع شارع(ن) غرب البحر زحمته فيه
شرق الصباحيـه شمـال الحديقـة
لا يابحر لو تدري الصدر وش فيـه
مااقفيت من شاطيك والصدر ضيقـة
حدتني ايامـي علـى شـي مابيـه
والمسألـة ماعـاد فيهـا طريـقـة
ماغير اروبع من قصيـدي واغنيـه
اللـي مصبرنـي بمـا لا اطقـيـه
لأني ماسمي شـي مانـي مسميـه
ولا احـدث العاقـل بمـا لا يليقـه
اللي يجينـي جعـل ربـي يحييـه
واللـي يـروح يسهـل الله طريقـه
لا هاجر رجولـه ولا مقيـد ايديـة
ولا ني زرار(ن) في حلوق الخليقـه
واللي يجيب العلـم واللـي يوديـه
تفـوح لـه دلـه ويغلـي بريـقـه
يرسل مراسيلـه وينـدب محاميـه
مبطـي يـدور فـي ملفـي وثيقـه
مايدري اني لا احتمى الموقف احميه
واحمي صديقه لـو عـدوه صديقـة
تصغر فعولـه قبـل تكبـر هقاويـه
ويعيش في طيب الوجيـه الطليقـه
هـذا زمـن مـره مغلـف بحاليـه
وضعوف الانفس بالنمايـم غريقـه
ياموتري قدمك اعـراض المهاميـه
وخلفك بساتيـن المواصـل حريقـه
للمتـرف اللـي كـل ماقـال لبيـه
يقولها ومن الخجـل نشـف ريقـه
ياحـي ابـو داره وياحـي طاريـه
اللي مـن العـلات يشفـي رحيقـه
عزالله انـي كثـر ماحبـه اغليـه
حبه مثل حـب الكويـت الشقيقـه
واحلى منه مافيـه واللـي محليـه
كله على بعضـه مشاعـر رقيقـه
اشعلت له جمـر القصيـد وقوافيـه
وسهرتله ليـل العشيـق وعشيقـه
وعلمته اسلـوب الغـرام ومباديـه
واشتقتلـه بالثانـيـه والدقيـقـه
حتى اصبحت كل المبانـي مبانيـه
تاريخ وامجـاد وحضـارة عريقـة
الله يغفـر اخـطـاه والله يخلـيـه
والله يحرسه مـن عيـون الخليقـه






شبيت من راس الفتيل القناديل


شبيت من راس الفتيل القناديل
وذبحت في ميلاد شعري تميمه
شاعر وامثل لابتي خير تمثيل
شعرن جديده يفتخر في قديمه
ابقى على حلم الليال المقابيل
تدفعني النخوه وقو العزيمه
ما اقول انا نجيب والا احمد زويل
اهل العقول الراجحه والحكيمه
لكن نحاول نرتقي جيل عن جيل
واكبر فخر إنا من امه عظيمه
ايامنا ذل وهوان وغرابيل
تهدم قيم والجهل مسرح جريمه
واعلامنا غزو عقائد وتظليل
قناة تمثيل وصحافه عقيمه
والشعر فصل حال الايام تفصيل
وجسد معاناة الشعوب الأليمه
واصدق لساني حلل الوضع تحليل
احساس شاعر نابع(ن) من صميمه
وانا ليا تغربت من غير تأويل
ارضي طموحي وافهمي يا فهيمه
انا ادري انه غرك القال والقيل
وكثرت عليك علوم راع النميمه
لكن ترى ماعاد لي للصبر حيل
ولا عدت اطيق المهزله والظليمه
صحيح اجابه صدمة الوقت وآشيل
والصبر مفتاح الفرج والغنيمه
واحاول ادور للأعذار تعليل
واقول ما ينسى نديمي نديمه
لك بين ريضان الحنايا مداهيل
ولك بالحشى حشمه وشيمه وقيمه
خوذي كلام اللي ليا قال ما يميل
وخلي كلام اهل العقول السقيمه
يا وردت(ن) مالت على ضفة النيل
يهبها ريح العبير ونسيمه
انا احتدملك وانثني واسرج الخيل
واعنلك واكرب شداد ريمه
ثلثين ليل وثلث باقي من الليل
بعد القطيف وقبل مفرق رحيمه
ترسل وانا مانيب يم المراسيل
الوضع سيء والنوايا مقيمه
رسايلك توحي بقطع المواصيل
الله يبيح اللي رعاك ويديمه
ماهو كذا تقفي وذودي مباهيل
وتهل دمعك مثل دمع اليتيمه
جرحتني توك وانا جرحي محيل
وهزمتني وانا ماعرف الهزيمه
وانا من احفاد الرجال المشاكل
بني عطا أهل الصفات الكريمه
إليا حدرنا وادي(ن) ضاربه سيل
وإليا تسندنا جبال(ن) مريمه
والمرجله لوهي ورا الجدي وسهيل
نسعالها سعي الغريم لغريمه
فهمتني والا تبي ندبل الكيل
نصيحتي خل العلاقه حميمه
لا تحسبن دمعي يبل المناديل
لا واللذي منعم عليك بنعيمه
إن رحت عني جعل دربك تساهيل
وإن جيتني غالي وقدر وحشيمه
طبعي كذا ماركض خلاف الاقاويل
وحسيبنا محيي العظام الرميمه






يامن تظل من تشاء وتهدي من تشاء

يـاالله ياالمعبـود ياالقـادر بتصريـف الريـاح
يامن تظـل مـن تشـاء وتهـدي مـن تشـاء
يامـن محـوت ايـة الليـل فابصـرت الصبـاح
رب المشارق والمغارب والسحـاب اليـا نشـاء
يارب اجرني من عذاب النار فـي يـوم الكفـاح
واغفر لعبدا طول عمـره لارشـاء ولاارتشـاء
عبـدا تظاعـف قوتـه لاأذنـولـك باالـفـلاح
ولااطـاع بمعصيـه لـك باالحيـاه ولا وشــى
عبدا مداه بعيـد والدنيـا ماتسقـي مـن قـراح
ولاهمه الشهـره ولا الدنيـا ولاطـرد العشـاء
مؤمن واذا هب الهواء شرق(ن) عنه والصدر فاح
يكتب قصيد(ن) من سمع به انتعش به وانتشـاء
يالله انا ماانطح صياح النـاس عنـي باالصيـاح
ولااختلق شي(ن) على غير الصراحـه لاحشـاء
جمل ولو كثرت سكاكين الجمـل يبطـي ماطـاح
ولاهمنـي راي الـردي ابـا علـي والا أشـاء
لكّن هرّاج القفـاء يطعـن بـلا سيـف ورمـاح
ويلقح قلـوب(ن) نظيفـه باالظغائـن ويحشـاء
مايدري انه ظـل عـن درب الهدايـه واستبـاح
اعراض مؤمن في زمان(ن)من معاصينا غشـاء
وتظميد جرح المشكله اخير مـن نـزف الجـراح
ومن يفتش اعراض البشر لابد عرضـه يفتشـاء
والا الوجيـه الفالحـه لاخـوف منهـم لاجنـاح
اهل العقول اللي ليـا جاهـم تلعثـم واختشـاء






للي علي حد الحدود

البارحه ياللي وجودك جـود وغيابـك جحـود
يااللي هـل النمـات لـو يرمونهـا يخطونهـا
يااللي شمال من الخبر شرق(ن)عن رمال النفود
يااللي تعنينـي لهـا اقدامـي واجـي لعيونهـا
ماهي وراء حد الحدود الا علـى حـد الحـدود
البحر كله من وراهـا والسهـل مـن دونهـا
البارحـه مابيـن ريحانـك ونفحـات الـورود
هبت هبوب الشوق والذكرى تميـل غصونهـا
احييت فيك الطاري المعهـود والحبـل معقـود
وغنيت لك منظومـة(ن) طاروقهـا ولحونهـا
قصيدة(ن) ياكثر ماجاني عليهـا مـن الـردود
وياكثر مـن غنـى لحنهـا بعـد مايقرونهـا
ماهيب من طرق الرومنسيه ولاقـرق الهنـود
ابيـات تبقـى للزمـان ولونهـا هـو لونهـا
ماألذ من طعم الغلا ولاأمر من طعـم الصـدود
يالله عسـى ربـك يعيـن وجيتـك ياعونهـا
يومن من ايام السنه وليل(ن) تغطيـه الرعـود
سريت لـي فـي ليلـةٍ والنـاس مايسرونهـا
اسرجت للمسراح خيـل وحـن للمـرواح ذود
وعدتني الشيمـه وخـوف النـاس لايعدونهـا
اللي تقيدنـي وانـا يابـو فهـد مالـي قيـود
ولازال تطعنـي وانـا لازلـت اشيـل طعونهـا
اللي مشكل حزبهـا فينـي ولاحـزب الليكـود
فديتهـا عسـى هـل النـمـات مايدرونـهـا




____________________________________________________________________________________________________
الرجوع الى أعلى الصفحة اذهب الى الأسفل
خالد
اداري سابـق ♥
اداري سابـق ♥


عدد المساهمات : 676
تاريخ التسجيل : 23/12/2010

مُساهمةموضوع: رد: مجموعه من قصائد محمد مريبد العازمي :   الجمعة مارس 18, 2011 5:31 pm

تسلم ويعطيك العافية
ونشكر لك ماتقدمه من مواضيع وبروزواضح

____________________________________________________________________________________________________
الرجوع الى أعلى الصفحة اذهب الى الأسفل
 
مجموعه من قصائد محمد مريبد العازمي :
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
ابو حدود  :: اقسام المنتدى :: المنتـدى الادبــي وكل مايتعلق بالنثر والشعر والقصص والمحاروات ♥-
انتقل الى: