كم صقر وقت الشدايد دجاجه

مـــا كـــل من يضحك بدنيـاه مسـرور
لــو ضــحــكته دايـم تحـرك حجاجــه

وما كل من يبكي من الناس مقهـــور
بعض الدموع رخاص من شان حاجــه

وما كل صادق لو حكا لك من شعـــور
يـــا كــثــر من زيف المشاعـر خراجـه

وما كـــل ما يخفا من السـر مــستـور
بعض الوجيه ابين من ارهف زجاجـــه

ومــا كــل بــيــتٍ بابه انصـك مهجـور
كـم بــيتٍ اطفا الشح واهـج سراجـه

ومـــا كـــل وردٍ تــزرعــه ينثـر عطـور
لــو مــاه صـافــي مـا يخالـط هماجـه

ومــا كــل مرهــف قلب لو يزرع زهور
قــلــب يحب الورد وهو مثـل صاجـــه

وما كل من يخطي من الناس معذور
البعض يخطي من علـوم العواجــــه

وما كل من يسكت على الظيم مجبور
لجل الغلا ساكت ويدعـي انفراجــــه

وما كل راسٍ ضيع الفكر مــسـحـــور
كم راس سحر الحب جاب ارتـجـاجــه

ومـــا كــــل عله فادهـا طـب دكتــور
كــم مـــن عليلٍ وصـل خلـه علاجـــه

وما كل من شاور حكيمٍ خذا الشــــور
بعـض الـبـشـر مـا يقنــع الا مـــزاجـه

وما كل من سمي صقر يشبه صقور
كم من صقر وقت الشدايـد دجاجــــه

وما كــل فــزاع لجـل مــدح مشكــور
البعـض مرجلتـه وسامـه وتــــاجـــه

ابداع وتميز دائم يعطيكي العافية